17– AMALIY KEYS: Raqamli texnologiyalarni joriy etish orqali ta'lim muassasasida innovatsion ekotizim yaratish
Vaziyat
Direktor e-maktab tizimidan foydalanish boʻyicha ichki monitoring oʻtkazganda shuni aniqlaydiki, aksariyat oʻqituvchilar elektron kundalikni faqat “baho qoʻyish” va “kunlik reja yuklash” uchun ishlatadi, xolos. Tizimdagi maʼlumotlarning eng katta qiymati oʻquvchilarning oʻsish dinamikasi, baholardagi keskin pasayish yoki koʻtarilishlar hamda dars davomati boʻyicha hech qanday tahlil qilinmaydi. Masalan, bir oʻquvchi 2 hafta davomida muntazam past baho olib kelayotgan boʻlsa ham, oʻqituvchi bunga eʼtibor bermaydi.
Sinf rahbarlari ham e-maktabdagi statistik maʼlumotlardan foydalanib, oʻz sinfi boʻyicha erta ogohlantirish yoki profilaktika choralarini koʻrmaydi, chunki tizimdan tahliliy foydalanish koʻnikmasi rivojlanmagan. Natijada e-maktab real monitoring vositasi boʻlish oʻrniga oddiy “raqamli daftar”ga aylanib qoladi. Tahlil shuni koʻrsatadiki, maktabda texnologiya mavjud, ammo raqamli pedagogika, maʼlumot bilan ishlash madaniyati va tahliliy qaror qabul qilish koʻnikmalari shakllanmagani sababli innovatsion ekotizim rivojlana olmayapti.